خلى بالك من مراتك  …بقلم نورا عواجه

خلى بالك من مراتك  …بقلم نورا عواجه

.بقلم نورا عواجه

فى الفتره الأخيره مفيش غير أخبار حوادث قتل الزوجات لازواجهم ،
بشكل غير إنسانى أو أخلاقي وغير طبيعى ، أولا على طبيعة المرأة وطبيعة المجتمع الذى نعيش فيه ،
المرأه التى خلقها الله وهيئها لإن تكون أم وجملها بأجمل مشاعر فى الدنيا ، الحب والحنان والعطاء والإيثار ،
مستحيل تتحول لوحش كاسر معدوم الرحمه والإنسانية وتزهق روح حرم الله قتلها . إلا إذا لاقت ما لاقت من الدنيا والناس والزوج من قبل ، وتحولت إلى النقيض ،
والسؤال هنا ، إيه ال يخلى أى إمراه تتحول للنقيض ، وبلا تردد تقتل إنسان عاشت معه عمر وأنجبت منه فلذات أكبادها..!!؟
أى ست مهما كانت قلبها فى ودنها وبتصدق أى كلمه حلوه
وفى مقابل الكلمه الحلوه دى مستعده تعمل أى حاجه ،
وفى مقابل معاملة حنينه تديك عينيها وقلبها وهى راضيه وشايفه إنها مقصره فى حقك كمان .
الست دى نفسها لو إنجرحت وإتهانت وأتقهرت وإتوجعت وإتحملت فوق طاقتها هتتغير إلى النقيض من غير تحس . وال قدامها مش هيستوعب وقتها الصوره التانيه ال بقت عليها . لانه إتعود أنه ياخد وبس . ومتخيل إن ده حقه وأنه فرض عليها أنها تفضل طول حياتها تدى وبس ، وده اكبر ظلم ممكن تتعرضله اى ست.
الست لو إتعرضت لكل الضغوط دى ومفيش قدامها أمل للخلاص من عيشتها . بتبقي واقفه على حافه الإنهيار ولو إنهارت هتبقي قاتله من غير ماتشعر ،
والإنهيار ده مش بيبقي وقتى لا ، ده بيبقي نتيجة تراكمات سنيين طويله عانت فيها الأمرين وبيحصل على أتفه الأسباب .بس السبب التافه ده مكنش إلا القشه التى قسمت ظهر البعير ،
وال حصل وبيحصل ماهو جرس إنذار للرجال القاسيه الأنانيه معدومة الرحمة
ال بيشوفوا الست ماهى إلا خادمه ومربيه وفرض عليها أنها تتحمل الفقر والإهانة وهى صابره وراضيه وتحمد ربنا كمان على إل هى فيه ،
مش بدافع عن القتل ولا برر لأى ست إنها تقتل ولا بحمل المسؤوليه للراجل لوحده . بس الست ال جوايا هى إل بتوصف وتقول
لانى على يقين تام إن المرأه لو لقيت معامله كويسه مستحيل تقدر تقول كلمه وحشه مش تقتل ،
عمرنا سمعنا زمان أيام آبائنا وأمهاتنا عن حاجه زى دى
أيام الموده والرحمه الحقيقه
والإحترام المتبادل بين الزوجين وكل واحد فيهم بيدى التانى حقه وزياده ، الستات غلابه والله بكلمه حلوه ولمسه حنينه يتراضوا وبالحب بيرضوا والعاطفه عندهم ديما غالبه عقلهم..
ياريت الرجاله تستغل ده وكل واحد يخلى باله من مراته مش هيخسر حاجه والله.
فبلاش القسوة والتجاهل والإهمال علشان مانندمش بعد فوات الاوان وبعدين نقول ياريت ال جرا ماكان..