{ 1}
يادكترة ومن غير ما اسمي
قسطرتوا المتحاش من همي
وسقيتوا وريدي المتغمي
ب ( المادة ) اللي هتكشف بوحي
وشاور لي الدكتور اتمدد
وجهاز التصوير هيحدد
ايه مخفي هيطلع روحي
والمسح الذري ده اسطورة
وانا خوفي تطلعي في الصورة
وتباني لأهل المعمورة
وانا باعدك عن مر جروحي
خبيتك جوه البنوره
خبيتك في وريد الخوف
ومنعت التصوير والشوف
ياحبيبتي الاشعاع في الجوف
محتاج من ريقك تصبيره
{ 2}
وقصايد ياما علي السكة
من اول مابخطي إليكِ
بتشب الفكرة ورا الفكرة
تتمحلس تخرج تناديكِ
وانا برسم في عنيا الصحة
وبخبي القرحة من القرحة
وبدندن اسمك ع السبحة
وبخبي الحقنة اللي قالت لي
أثناء ( المسحة ) اغنيكي
طب اغني واقول ايه للدنيا
وانا سابح في الناحية التانيه
من دلتا النهر اللي سقيكي
انا ميت حي على جفونك
بتسند وامشي في كردونك
هكتب لك من قلب العنبر
وفراشي المكلوم المضجر
وهقوم اتسند واعّبر
عن رغبة قلبي / مجنونك
كلمات الشاعر والأديب
أحمد إسماعيل إسماعيل
Discussion about this post