برغم الدمع

سلامة عيونك من الدمع يجري

ومقدرش اخفف عليكي البكا.

ومقدرش امسح عنيكي بإيديا

عشان غصب عني

حواجز كتيره

وحراس كتيره

بتمنع وصول  الحرافيش كمثلي

لقصر الأميرة

ومنديلي الابيض من الدمع زيك

يا عمري اشتكى .

سلامة عيونك

كأن الدموع اللي نازله لآلئ

تنور خدودك

دي من عيني نازله.

بتحكي لي عنك

وعن قلبك اللي يحب الحياه

ورغم المآسي اللي ياما التقاها

ورغم المصاعب ، ورغم المتاه

بيمشي ف. طريقه بنور الإله

يطبطب على كل مهموم يقابله

ويرمي لكل غريق ..طوق نجاه

ويحكي لي عنك بإنك ملاك.

على الأرض ماشي

وحامل رساله لكل اللي يائس

وكل اللي بالظلم والقهر حاسس

ومن كلمة واحدة تغير حياته

تخليه في لحظة مقاتل وفارس

ويحكي لي عنك كلام يا أميرة

قصص لو أقولها كتيرة ومثيرة

فمرات قوية ومرات صبورة

فليه يا حبيبتي ف. لحظة أشوفك

ودمعك مغرق كما السيل عيونك

ومش قادر امسح عنيكي بإيديا

وإنتي اللي إيدك تطبطب عليا

تقوي عزيمتي

وتدخل مدينتي

تشوف ناسي فيها

تشوفني الفقير اللي خايف عليها

تشوف نيل بيجري هناك ويداديها

ولو يوم بتتعب بإيده يداويها

تشوف طفل قلبي بيكبر ويكبر

ويفني شبابه عليها ويسهر

عشان خاطري كوني

كما الامس وردة

بلاش دمع عينك بلاش المناهدة

وايدك هاتيها في أيدي وعدي

على الحزن واجري وإياك تهدي

وغني لي غنوة .. ترد الحياه

تنور طريقي

وقلبي اللي تاه

كلمات الشاعر

د. جمال مرسي