كم يوم

الآهه جوه الصدور
محبوسه في القواميس
واللمه لمة حيارى
مش لمتك ياعريس
تسمع أنين النبض
ورا كل باب متاريس
وحياتك إللي عايشها
اتحولت أرقام
من غير ما تفهم ليه
من غير ما تعرف كام
والخوف دا ملو العين
من نظرة الحراس
يادنيا يا أم العبر
حبسوني جوه أقراص
وسقوني مر الكاس
من امتى كان العمر
يتعد بالإحساس ؟
من امتى كان النبض
بيفارق الأنفاس ؟
مهدود كيان الحرف
والحزن عنوانه
عصفوري أبن الفضا
سجنوه في أوجاعه
والخطوه متقيده
مرهونه على بابه
يومين تلاته أربعه
تايه عن احبابه
ولمين اقول الحرف
أو يكمل المشوار !!!
أصل الزمان قرر يسقيني
مر ونار
معدود من الأموات والنبض
لسه حي
يا مسجلين الآه كم آهه في الثانية؟
أنا ليه عذابي يطول في دنيتي الفانية ؟
قربت اسد الدين ولا الديون جايه
مع إني إنسان ضعيف تفرق معاه ثانية
بين الحياة والموت و سكتي
الفانية
يا أخر المشوار ممدود بحبل الشوك
يا كل حلم جميل خدعتني أحلامي
مهموم بأخر الرحلة والتوهه عنواني

كلمات الشاعر
رأفت عبد العال