الليل

كلمات الشاعر
عمرو عامر

الليل جبان بيخوف الأوليا
والدنيا ضيق …
مابقتش ليك أو ليا
فابسط دراعك للنهار جيبه
اللى انكتب للقلب.هيصيبه
واللى انهزم عا الأرض ما بيحزنش
نزل المطر والحزن هيفرع
تحضن فروعة قساوة الأيام
هرفع ايديا اليه وهتضرع
مين غيره قادر يصنع الأحلام
كان قلبى حلم يتيم بيتهجى
والقطر عمر بيسبق الأحداث
العمر كاس فوار وكاس مانجة
فمتنتظرش على الطريق تنداس
الليل دموع وبتغسل الأسفلت
أنفاس زهق وبتحجب العواميد
انا كنت كلمة خفيفة بس تقلت
بعد اما خف الدهب م الإيد
الليل جعان بيعضعض الأجوبة
مليون سؤال اتهلكوا م التفكير
كل الجراح مخلوطة متدوبة
كل الفرص بتأول التفسير
وما زلت وحدى وجرحى ما اتفسرش