لما الضلام
يملا القلوب ويفيض
والشمس ترفض
تدى دفء جديد
والناس تلف ف دوامات الشقا
أيام تدور ع الحزانى
وما بتلاقيش العيد
بات اليتيم على حجرها
قلبه بلون دمعته
يحلم بلبس جديد
والحلم له حراس وله ملايكه أكيد
والست فاطمة
في زمان الضيم
بتشق روحها شموع ف قلب الغيم
مش أي ست
دي بنت أصل كريم
عايشة بتزرع فى القلوب بساتين
تمسح بإيدها
كل دمعة ف عين
وتداري طعم التعب
عن نظرة الشامتين
…
الست فاطمة بيتها ضليلة
لامة الجيران
والأهل
والعيلة
وتخش بيتها تلقى ريحة الفل
حصيرتها واسعة كات تساع الكل
جايبة النهار وعلينا جايه تطل
ما يهمهاش الجاي مهما يكون
واقفة ف وش الزمن
واخدة من الله العون
بسمتها بلسم يداوي
أي قلب حزين
…
الست فاطمة بنت أبوها بجد
وقت الفرح…
وقت الوجع بتسد
جواها طيبة فوق حدود الحد
شامخة ف وش العدو
زي الهرم والنيل
متحملة ما اشتكت
ولا انحنت لعويل
والحق صوتها القوي
ولا كنش مرة ذليل
الست فاطمة
خيرها مش ليها
تعمل ماعونها وعيشها بإيديها
ماشية الحياة خطوتها جد الجد
توبها الكرامة وبس
ولا تخشى سطوة حد
ولا مرة تشكي
غير لرب معين
…
الست فاطمة شجرة طراحة
راخية الضفاير خير
ف الدار وع الساحة
فاردة الجناح فوق الولاد راية
تزرع بإيدها في قلوبهم نور
تمحي الضلال والحقد لو صابهم
وتاريخها يشهد ع الزمن بسنين
الست فاطمة يومها لسه مجاش
وخيالها دايما
سقفه مابيعلاش
فاردة إيديها بحلم كله حنين
ويا مين يطبطب ع الحزانى يامين ؟
…
الست فاطمة
حلمها قيراطين
تاكل فى خيرهم يا دوب
ما تعيشِّ يوم بالدين
تبني عليهم حلم يملا العين
يكفوها ذل السؤال
أو قهر كسر العين
لا هي عايزة جاه ولا م الفلوس ملايين
الجاه نسبها والأصول عيلة
ولا حد ينكر فضلها والأصل
من عهد مينا موحد القطرين
…
الست فاطمة
عندها بنتين
طالبين عدل
هو العدل راح فين؟
الست فاطمة
عايزة سقف متين
عايزه الدفا مش بس بالبطاطين
عايزة الحنان والعطف بين الناس
والأخ يسند أخوه
تبقى المحبة أساس
والعدل يفرد شراعه
سفينة للمساكين
…
الست فاطمة ريح هوا ينسم
شايله الحمول ما اشتكت
وعيونها تتبسم
شيلاها ع الكتف الشمال أهوال
وغناها ع الكتف اليمين موال
جاها زمان مفتري
شبعانة فيه تلطيم
كالنخل عودها لفوق
لم تتحوج للئيم
راسمه آمالها وعلم لسه جديد
بإيدين ولادها الحلم يبقى أكيد
والقلب نبع الرضا
مزروع بحبة مشاعر
مالية بإيمانها االكون
وقصيدة من قلب شاعر
قلبي أنا اللي حكى
قصة لبنت النيل
نبع الوفا والصبر
صامدة ليوم الدين
كلمات الشاعرة
فاطمة علام
أبلة فاطمة
Discussion about this post