عبدالرحمن صالح يحكي ذكرياته وصحبته بالمجال الرياضي في بني سعيدالمنيا

متابعة المباريات الأوروبية ومثله الأعلى في كرة القدم رونالدو الظاهرة البرازيلي .. من أبرز ما جعل عبدالرحمن صالح يعشق كرة القدم .

وبالتواصل معه عن ذكرياته في المجال الرياضي وصحبته وحكاياته ، قال : حبي للكورة زاد لما روحت اشتريت كورة جلد وكنت بحب اللعب بيها في الشارع لوحدي وعدت الايام وكنا نتجمع انا والصحاب ونقسم فرقتين ونلعب مكناش سعتها بنروح مركز الشباب اللي في البلد غالبا كنا بنلعب فالمكان اللي عند بيت العمده كان مشهور “بالزاروق” «حسب اللهجة ووصف الشباب في ذلك الوقت » .

وتابع عبدالرحمن ، ابتدينا نعرف بعض اكتر في اللعب اتعودنا على بعض فقررنا نلعب في مركز شباب القرية دورة رمضانية كان أول اسم فريقنا اسم (ريال مدريد) كنت أنا ومصطفى حجاج ورجب عبد الحميد بس خسرنا سعتها الدوره برضو كملنا بس باسم جديد للفريق وهو مثلث الرعب اللي لسه قيمة الفريق موجود حتى وقتنا هذا لانه اكتر فريق فاز بالدورة.

وأشار عبدالرحمن ، وكان فيه مجموعة من اللعيبة التقيلة « أي تتميز بقدرات وإمكانيات جيدة » .

وعن طموحاته في ذلك الوقت ، قال : كان نفسي اكمل المشوار فقدمت في نادي المنيا مع ابو الدهب ورمضان والحمد لله قبلت فالاختبار وبدأت مشوار مع الحلم وسافرت القاهره معاهم واخدنا بطوله الجمهورية بس مكنش عندي إصرار كفاية اني اكمل واشوف مكان أفضل لان جت فتره من الوقت كانت الدراسه فميعاد التمرين وان غبت عن أي من الاتنين هتفصل وللأسف اختارت الدراسه بخوف اني اتفصل .

وعن طريق زملاء له ، وعن رأيه في فرص جيله وصحبته ، تحدث قائلا:
إنما اللي كان عنده إصرار وعزيمة كان (الكابتن رمضان ربيع) ومهمهوش اي عائق وكمل المشوار بس احلى فترات حياتي كانت فمثلث الرعب الفريق اللي قدم أجمل لعب كره في الوقت اللي كان موجود فيه وكانت فيه ناس عندها مهارات عاليه مننا ومن الخصم اكتر حاجه مظلمه اننا مفيش اي فرصه جت لينا واحنا فرطنا فيها جيلنا كان يستحق انه حد يشوفه ويفتحله الطريق للعب في الأندية الكبيرة بس عيبنا في البلد دي انها مبتنميش الموهبه غير بدفع المال.

واصفًا إمكانيات زملائه في خلاصة موجزة :
جيلنا كان يمتلك جميع الامكانيات في أرض الملعب يعني لو عايز المهاره عندك ابو الدهب لو عايز الأسرار عندك رمضان ربيع لو عايز المتعه والأداء عندك مصطفى حجاج لو عايز الثبات واللعب النضيف عندك رضا اسماعيل لو عايز الروجوله وحصن الأمان فالدفاع عندك رجب عبدالحميد لو عايز حارس عملاق عندك محمد محمود الناس دي كلها وفي غيرها كتير لعبت كره القدم فاجمل صوره ممكن تشاهدها إنما للأسف مفيش ايد اتمد ليهم عشان تحطهم فمكانهم الحقيقي.. اللي هو أكبر الانديه فمصر… لان سعتها مكنش في حد يقدر يشوف المواهب ويكبرها.

وفي نهاية حديثه :
بس لو ليا مكسب في كرة القدم فهو بدايته ونهايته الناس اللي كان ليا الشرف اني ألعب معاهم واكون واحد منهم .