الشاعرة ريم صلاح تكتب شكراوكأن الموت شجرة كبيرة

شكرا
…..
وكأن الموت شجره كبيره
وانا طير مربوط جوّه فروعها
مسموحلي أطير من غصن لغصن
وكأن القلب اللي ف صدري
منذور للحُزن
الفرحه ما تلحقش تجيني
وتحوّد عنّي تروح لبعيد
وكأن الحزن سكير عربيد
ماشي بيتطوّح ف وريدي
طب زيدي يا دنيا كمان زيدي
وارميني بقسوه ف كهف الموت
م انا قلبي الغلطان م الأول
علشان بهواكي سنين مربوط
من حقك تخنقي فيّا الصوت
وتدوسي عليا كمان وكمان
من حقك لما الفجر يبان
تحدفي على عيني ستاير ليل
من حقك أزرعلك أفراح
تكسري ف طريقي إزاز الويل
أمشيكي وتنزف أقدامي
من حقك فوق جرحي تنامي
وان مرّه عافرت وقومت مشيت
تفرشي أحزانك قُدّامي
مش قادره أقولك غير شكرا
أنا ماشيه وسايباكي ولكن
هبعتلك .. م الجنّه سلامي
…………………………..

كلمات / الشاعرة ريم صلاح