قمر الموت

تامر أنور / مصر
1-
محنيّة
عواميد النور
بتبصّ عليك
هربان الضل المذعور من بين رجليك
وخطاوى الحلم المتكسّر
بتجرجر فيك ،
وكلاب السكة المسعورة
بتجر ديولها وتدّارى
وبتنبح ورا موت خطاويك
مهجور الشارع فـ عنيك
والليلة
اكتمل البدر
واتقفلت كل الأبواب،
وبيعوي الخوف
بتخبّط وإيديك .. بتنزّل دم ،
قفلوا الشبابيك
الليلة كات ليلة الديب
والناس ف بيوت الخوف،
وحدك ضد المجهول
بتنادي شبابيك النور،
مقفولة ف وشك أبوابهم
بتداري البوحْ
حشرجة الصوت المنبوحْ
تلهث أنفاسك وحدك،
ف ضلام الليل مع قمر الموت
وأخيراَ
باب راح يفتح لك
علشان تدّارى،
ابتسمت أنياب الجوع
واترسمت ضحكة
فـ عنيك الحمرا
********************
2-
القمر الليلادى بدر
يعنى المفروض إنك تخَرَّج
كل رغباتك الدفينة
و تتحول
أُقَف قدام المراية
راقب أنيابك كويِّس و هىَّ بتظهر
و ملامحك اللى بتزداد شراسة
و ضوافرك اللى بتطوّل
و أنت أساساً مُشعِر
المشكلة الحقيقية
ازاى هتستغل قدراتك الجديدة
هل حتنتقم من القطيع اللى كرشك
عشان جريمة قتل معنوى؟
إنتَ معملتهاش
و اللى القاتل الحقيقى فيها
هوَّ اللى بيبلغ عنك فـ كل مرة
و يقبض المكافأة
ولّا حتمارس دورك الطبيعى
و تشوف فريسة من إياهم
مفيش وقت للتفكير
إنزل للشارع و حَتُفرَج
الناس بتبصّ عليك و بتضحك
شكلك بايخ جدًا
و إنت بتحاول ترعبهم و مش قادر
أنا نفسى بضحك عليك
و أنا شايفك ف المرايات و إنعكاسات الفتارين
و أنت بتزغـُر و الناس مش فارقة معاها
يظهر إن انت مش الوحيد اللى اتحوِّل الليلادى
أنا شايف كتير غيرك !!
كل واحد فيهم حاطط إيده ف إيد الضحية
و واخدها على البحر
علشان الليل ستَّار
و البحر أكبر م البير،
إحساسك بالليل..و الجوع..و الوحدة..و الأهم إحساسك بالفشل
بيخلوك تحس إن انتَ الديب الوحيد
الشارد عن القطيع
مفيش قدَّامك دلوقتى
غير إنك تستحضر بنت الجيران و هى بتنشَّر
و القنوات الفضائية إياها
و تبص للقمر و تعوى
أهى أى حاجة تحسسك بوجودك و خلاص
قبل ما القمر يختفي