على بسط حنية ومقام

على بسط حنية ومقام …
وبعادي عنك نصي بيسح الدموع
بحروفه اللي اتشكلت
من حبو نبض لباب بعيد
والقلب سرقاه الحياه
من صدر صاحبه اللي ابتدا
الشيب يقدّم كاسُه ليه
يشرب ويتهم في الزمن
إنه اللي دايماً جاي عليه
والليل هزيعه بيتولد ليل من جديد
والليل بريء
من ضلمة الروح في البدن
والشمس بتسيب الغمام لعيون قلوب
بتشقُه وتشوف السما
بوصال صلاة الناسكين
في زوايا محراب المنى
زي الخمايل رفرفت
بشرى وحنينهم ينبعت
للمسايين ..
ع الشعرا اللي بيزرعوا
حروفهم نجوم زيّك تمام
أبداً ما تاخد سكتك
يم إنتصار يأسك عليك
أما البعاد ..
لو كان خيارك م الأساس
كان وردك اللي مسلّمك
غصنه اتوكس
ولا كانش بوح وترك يكون
رحلة شذاه
بالإنفلات للقُرب من أملك تبات
على وعد لجراحك تنام
على بسط حنّية ومقام
بيطيب لوجدك في الرجوع
للي هداك تِوصل سليم
علشان تموت !!
في طريق يودي لسلسبيل .

كلمات الشاعر
حمدان حلمي