من بين
مفاصل لخلخت كتف القصيد
كانت بداية الملحمه
بصيت لروحي فـ الخلا
فـ لاقيتي مليان بـ الجراح
والجسم مترشق جروح
طب فين اروح
او مين بقىٰ
شافني فـ قلب المُلتقىٰ
والعضم حطبهُ بـ يستوي
والجسم مش شايل فيه روح
أو مين يشوف
إني بطوف على أرض غير الأرض دي
وكأني طير وبـ يتشوي
محشور فـ سيخ الأسئله
انا مين أنا ؟!
أو ليه هنا ؟!
سنتين عجاف جوه القصيد
بنحت خطاوي الأجوبه بين السطور
وأعلن عفاف لحني الوحيد
تٍعٍزف حَواف وتري المريض
فـ انزف هموم سن القلم
دم القصيد
ريحة الجراح
صوت البُكا
وسع البراح
فـ اللوحه تطلع مؤلمه
الشعر عم الل إشتكا
إلا أنا داير بلف على الجراح
وفـ كل بيت بـ أغزل قصيده من الألم
وألبس مشاعر من عدم
وأبني المجاز فـ قلوب عزاز
ساعة المخاض
تولد قصيده من الندم
مـ الشعر
فلسفة الحوار بين الخيال واللي إتردم
كلمات الشاعر
وائل رشوان
Discussion about this post