جنازة حيْ

وكنت ف دوخه مش عارف

بأموت واللا يادوب تعبان

وفاجأه لقيتني مًش شايف

ولا مفرّق بين الالوان

ولمّا وقعت من طولي

وبان الجو فيه دخـّان

عشان العمر له آخر

وكل من عليها فان

وناس قالوا العزا قاصر

وناس قالوا نجيبله صوان

وناس نادوا ف مساجدنا

وقالوا بلاش عزا النسوان

سمعت قرايبي بيقولوا

ما سابش قيراط ولا فدّان

وواحد منهم إدّارى

عشان ما يشيلش فى الدبلان

صحيح الخلق كات ياما

لكن مش كله كان زعلان

,,,,

وانا ساكت وبتأمّل

وداير باسمع الاخبار

بأشوف الدنيا من أوضتي

وعيني تبص ع الأنفار

وكل الناس بتتفرّج

وعاملين زحمة عند الدّار

واحد بيوشوش التاني

بيستأذن وراه مشوار

واحد بيقول دا كان طيّب

لا كان خاين ولا غدّار

وغيره يقول دا كان فاشل

ما يسوى حتى حق حمار

,,,,

وشوفت حريم ما لوش آخر

كانـٌم جايّين ورى اخواتي

وشوفت عجوزه ندّابه

فى ركن الصالة بتهاتي

وفيه كام واحده بتصوّت

وعايزه تورّي لمراتي

وجايبه الطين على هدومها

عشان الجو كان شاتي

,,,,

سمعت مراتي بتلالي

وترمي كلام من الشباك

وغير جملي وابو عيالي

تقول ياريتنى كنت معاك

يا مٌر العيشة من بعدك

خلاص ما اقدرش يوم انساك

يا ريت ما كنت مكتوبي

ولا أقرُبلك ولا عرفاك

امانه يا طيري يا مسافر

تسلملي على الليّ هناك

,,,,

فى وسط الزحمة والدوشة

كلام خايب يهد الحيل

وناس مع ناس بتتكلم

وناس نا قص تقول مواويل

وكام واحد ناوى يزوّغ

ومش قاعد لآخر الليل

وغيره يقول موصّيني

أخش معاهم التغسيل

ولا واحد قرا الفاتحة

ولا آيه فى سورة الفيل

,,,,

كلام فاضي وما لوش لازمه

وشلـّة خلق هللاسه

وناس واخده المعازي  هزار

وهمز وغمز وغلاسة

وناس تشكي من الأسعار

وناس م الفقر محتاسة

وناس ترغي بدون فايده

فى حرب وكورة وسياسة

وجوز اخوان بيتباهوا

بقتل الناس فى كرداسة

وفيه عايق بيتمنظر

وغيره بيعدل اللاسة

,,,,

وناس تبكي على الميت

وناس بتقول ما لوش عازه

لا سايب ملك لعياله

ولا قرشين ولا حيازه

وناس تضحك بصوت عالي

وتنسى ان احنا فى جنازه

,,,,

وفيه نسوان بتستهبل

تقول يا عريس ويا صغيّر

ونفسي أقول دا ما يصحّش

لكن مش قادر أدّيّر

وفاجأه لقيت تلات تنفار

وانا سرحان  ومتحيّر

راحم شدّينيّ من طوقي

زراري ف وشـّهم طيّر

وقالوا عشان  يبات ميّت

لابد هدومه تتغيّر

,,,

وخمسة يقلبوا فيّه

وراجل شكله كان قرفان

ينادي سخـّنوا المايّه

ع بال ما يخيّط الأكفان

وبخـّر غرفتي النيّه

ورشرش ع القماش برفان

وشايل حٍنـّه فى جيوبه

عشان يبدر فى قبرى حفان

,,,,

وأنا نايم ومستسلم

ومستنيّ النهارده يفوت

لقيت الخلق شايلنيّ

ورامْينيّ فى قلب تابوت

وطلعوا بسرعة ع الجامع

وكل الناس سمع وسكوت

وقمت اصليّ ويّاهم

لقيتنى بالكفن مربوط

وجيت واقف على حيلي

وسارح حبّه فى الملكوت

لقيت الشيخ طلع يجري

وتاهت صرْخته فى الصوت

وناس فرحانه بتهلل

وناس مصبوغة صبغة يوت

لمحت وريث بيتـنطـّت

فى وسط الزحمة راح مشطوط

يقول عايز سلاح

ابيض

شوفولي  مطوا او نبّوت

وقال لو حيلته بصلايه

ما نيش سايب نصيبي يفوت

انا خايف يعيش تاني

ما صدّقنا ان هوّ يموت

 

كلمات الشاعر

سعد الشرقاوى