باعافر أقوله…أنساني
بقاوم لهفتي لقربه …ولهفه قلبي منعاني
سافرت بروحي لجزيرة وجع … وداريت
صرخت….. ناديت …
لما البعد بيجرح…ليه في القرب مااتحنيت ؟
وليه الفكرة شط بعيد وأنا في مركب أمل مكسور ….
ومجداف روحي بيعافر …موجه شوق …..
تعبت …. بكيت …فقلت ياريت
يقولي …
باحبك…. وحشتيني
مادام القلب في مكانه
وسهم الرمش بأمكانه
ينسى الماضي وأحزانه
ويرمي الخوف وأيامه
وروحه تلمس الأشواق
ماتيجي نعيش كما العشاق
نقول الشعر للمشتاق
ويبقي حبنا ترياق
لو مرة نحس البرد جوة الروح
وإذا مرة صادفنا فراق
نحس المعني ناقص شيئ
ويوجع لو يكون ده رياء
حبيبي….
البعد ده آفه … بتحقن القلوب إعياء
خلاصه القول ..مادام القلب متدفي بفعل وقول
فخلينا علي فرس الحنين والشوق
نرمح رمح
وخلي الدمع سوكيتي
ف نقطه هناك…
ومن أول كلام في السطر …
وحشتك ليه …وحبتني
طب اثبتلي ..بلاها كلام
وهات أفعال تخليني أحس الطبع فيك غالب ..
وطبعك فيه الحياء غالب …
طب اثبتلي وأشرح لي …
مدي الأحساس مدي اللهفه
مدي الأشواق
وحشتيني…
و بتقولها…
طب أشرحها وشيل عنها غبار الصمت وأكتبها بلغات تانيه …مانا بفهم يمين بالله …
حتي لو حتهمس همس
بأي لغات جان أو أنس
ومش محتاج لحزن بديل ولا نوع تاني م اللهفه
ولا تقويل ولا تبديل ولا تأويل …
بلاش يقتلنا قول البعض..
بلاش تدبحنا نظراتهم …
وخلينا نعيش اللحظه بالممكن
و بالمعروف
ولا تبعدنا تاني ظروف…
وقولي باحبك …قول كمان وحشتيني
يا أجمل حب شاف عيني …
ولا تضرب في تفكيرك ولا أخماس ولا أسداس
ولا تحسب فى تفاسيرك
فتحتار في الكلام والهمس
وتتمني اللقا واللمس…
ولا يزعل قمر أو شمس
تعال وقول وحشتيني وانا ح أعلنها ع المكشوف …
دي بذرة حب طرحت شعر غطي الكون
سما مع أرض …
كلمات الشاعرة
هيومة حمزة
باكينام حمزه
Discussion about this post