ما بنسى ….

ما بِنْسى …
الشاعرة سميرة فاضل غانم
رح خبرك عن شي
وبدي تحسب حسابك
يمكن كلامي يزعلك
ما ينال إعجابك…
نسيتك أنا
ومش من اليوم ..
من كم شهر
نسيت كمشة هالفرح
ونسيت أكوام القهر
ومْحِيت أسبابك ..
نسيت شوقي إسمعك
والحلم إني إقشعك
ونسيت صنفاتك وهفواتك
واللهفة والرجفة بحكياتك
وكل الكلام الحلو لو صالحتني
وشْطبت إسمي بدفتر حبابك …
لكني مهما عِشِتْ
ومهما بيعدت وتغيروا عتابك
ما بنسى وقت زْعِلِت
حيرتك لما عرفت
تَيشيل همي هودج غيابك
وما تركتني حتى ضحكت
تنهدت ساعتها وقلت
هلق رتحت … ورحت
وقلبي معك حمّلتو بعبابك …
بوقتها عشقتك انا وفهمت
ان الغرام ولِ نكتب عنو
اختصرتن إنت
وتنهّدت عالحب لْ موتو عتابك …
لكن نسيتك أنا … والله نسيتك أنا
ودفنت مع هالورده الوعد بكتابك