ورقة خس وورقة توت

القلب الطيب يستاهل
انه يعيش ولا لحظة يموت
اضحك ،افرح قوي من قلبك
دوس على جرح العمر وفوت
اللي ف وقت الشدة يفوتك قاصد موتك
كلمة حق بعلو الصوت
قول للظالم مهما اتمهل
ذنبك في كتابك مثبوت
ولا يوم تيأس او تستلم
واصنع من ضعفك جبروت
ورقة خس وورقة توت
لون الجنة بسحر خضارهم
زى الحلم بشوق مرسوم
لو تخسر حاجة بتعشقها
احمد ربك عالمقسوم
ربك عالم باللى ف قلبك
ولايرضى يسيبك مظلوم
خلى عزولك يفرح حبة
لا سعادة بتبقى ولا هموم
واعشق وافرح واضحك و اسرح
ويا غرامك في الملكوت
ورقة خس وورقة توت
روحك تشبه قلب الخس
بسحر نضارتة براءة و شوق
ورقة خس الطير لو نالها
بيحمد ربه و يعلا لفوق
شكر النعمة يذيدك منها
هى الخير الزاد والقوت
ورقة خس وورقة توت
شوفت القز بيبدا عمره
وكل حياته بورق التوت
يشبع منه ويكبر سنه
يدبل عوده نقول هيموت
ينتج اغلى حرير في الدنيا
ويغزل دايرة بشكل تابوت
يكسر ضعفه تمام جواها
ويتحدى باصالتها الموت
ربنا عالم شهد إرادته وحسن ظنونه
ويبدل ضعفه جناحات
يرجع تانى فراشة جميلة
و يتحول سعيه نجاحات
ويطير بسعادة ونتعلم
من صبره وإصراره حاجات
والدنيا دى صعبة ومش سهلة
واللى بيصبر تتباهى باسمه الحكايات
واللى يضحى بعاشق حبه ويكسر قلبه ضله يموت
عمر الظلم ما علا بيوت
صبرك على اوجاعك غالى ذهب وياقوت
صوت الحق بيفضل عالى
عمره ما يقبل لحظة سكوت
حب حياتك واعشق ذاتك
خلى ضميرك بيك مبسوط
عمر الحب ما كان له شروط
حبنا واصل بيننا خيوط
بين الخير والشر خطوط
طيرك بمصيرك مربوط
واللى يلاقى بديل ويفوتك فوته وشوط
قلبك سالم رزقك دايم مش مشروط
ربك قادر يرحم ضعفك
يجبر كسرك وقت سقوط
ولا من رحمة ربي قنوط
ورقة خس وورقة توت
القلب الطيب يستاهل
انه يعيش ولا لحظة يموت

كلمات الشاعر
نبيل عبد الرحمن