ياخطوط الطول ودواير العرض
انا صاحب القارة وصاحب الارض
انا كل جزيرة وبحر ونهر
انا ضل وشمس وحر وبرد
….
انا حافظ جلدة كراريسك
وظروف الجو وتضاريسك
انا احمس طارد هكسوسك
وفصول بتعلم تلاميذك!
……
انا اقدم شارع وميدان
وعيون المَيّه ف حلوان
انا صوت ترنيمة ف كنيستك
وجوامع ترفع في آدان
……..
انا نورس حاطط على شطك
والحبر اللايق على خطك
انا شفة وشالت كام بوسة
وبتنزل بيهم على خدك!
……
اهرامك مين اللي بناها؟
والامك مين اللي عاناها؟
وجميع غناويكي اللي اتكتبت
مين كان لحنها وغناها؟!
…….
انا كل شهيد ضحى بدمه
وجميع الناس اللي اهتموا
انا كل الورد المزروع لك
وازعل لو غيرك هيشمُه!
……..
واندم لو روحت بلاد بره
وكأني انا عايش مع ضرّة
ويفور الدم ف شراييني
لو ضهرك شوفته بيتعرَّى!
…..
فازاي اما اطلب بتمانعي!
هو ابنك ابن مهوش شرعي؟!
فان كنت ضناكي ليه صدك؟
وان كنت سيوفك فين درعي؟!
كلمات الشاعر
سمير محمود
Discussion about this post