غفير استانلي …

  كلمات الشاعر 

فارس ابو تريكه

غفير استانلي …

و اديني يا ستي هترهبن و هفضل زي ما وعدتك 

وحيد لو حتي متكهن و واخد جنب

و هفضل برضه كالعادة بحبك و انتي مالكيش ذنب

لا قادر اشوف بنات غيرك 

و لا عارف ابات و اصحي و عطرك طار ماهوش فيا

و لا بعرفش غير طيفك مونسني

و حضنك سلسبيل الشوق و ليكي ردار بيحرسني و انا ماشي كما الدراويش

معالمك تحفة فنيه اثارك ع الكتاف فيا 

نُقر خرابيش

و قسمتنا في رغيف العيش

و ضحكتنا اما بندوقها علي طرفين شفايف لوز

و نظرة لهفة في عنينا 

وقت ما حضننا بيعوز يِجمعنا

و صوت الاها من شوقك و اخاف لو حد يسمعنا

و يمنعنا غفير ♡ استانلي♡ م الاحلام

و صوت البحر و الموجه و اسمك ضي ع الرملة

بحبك لو حجزني الصخر 

و لو كان الوطن ضلمة تكوني النور

تكوني القمره و النجمات 

و تفضلي حاجزة فيا الدور

و اول تذكرة فرحة و اخر رحلة للمكسيك

و اخر حد ظبط الشاي و اول حد دوقني العسل ف الكيك

و اول فاكهة بقطفها ب إيدين دافيين

و اخر حد يرمي في حضني رُمانتين

و انا و انتي كما المساطيل في ليلة سُكر عشوائي

و عركة ما بين وحشتيني و مش باقي سلاح فتاك 

غير العشق واشواقي

و انا الباقي في جيب قلبك كما القرش اللي براني

و مهما بتعندي فيا با اغيب و ارجع و انا ايش بس دراني

غير الخمرا اللي في عينيكي و بيرة في حضن كفيكي 

و مازة عنبك الوردي

يا حالفه ما بيني ل تعدي بتاخدي القلب ليه رهينه

ده انا و ضلوعي عدينا حدود قصرك بدون تجريح

و بيعنا الشمس علشانك و دوبنا نهارك التفاريح

و سيبنا الليل عشان مايع بدون ما تكوني فيه قَمرُه

و جيبنا الشتوي وقت الصيف و سيبنا الصيفي للشتوي

و بدلنا الربيع ب خريف و سيبنالك شهور وايام

و سيبنالك رصاص الكحل لاجل ما ترسمي الاحلام

و سيبنا الروچ علي مزاجك و علي كيفك

و سيبنا علامة استفهام تردي بعدها كيفك و كيف اخبارك الجرانين

و عناوينك عشان تايهين ما بين قلبك و بين عينك

نروح نسأل علي الباقيين يردوا حواجبك الراقصين و يبعتوا روحنا شطينك

و ادينا يا ستي شاطبينك من كشف الحريم الزور

يا بنت القلب حاطينك عشان حابين في خانة الحور

و رشينا القصيدة بخور عشان متباتش محسودة

و قشينا دور الشايب و عدينا في سنين سودة 

و لسه مع الغرام صابرين

و اديني يا ستي هترهبن و وعد الحر دايماً دين

  كلمات الشاعر 

فارس ابو تريكه