طــشــاش …

 كلمات الشاعرة 

عفاف أحمد التركى

طــشــاش …

********

كانت..

يادووووووب خطوة..

والسكّة هتودي..

يا العمر يا معدّي..

يا صاحب الجتة.

قطّعني 100 حتة.

واعكِفني علي عتبك..

في دخولي ايه عجبك..؟

في خروجي مين شطبك..؟

وشط بك..بعدي..؟!!

انا مركبة ومجاديف..

والبحر مِستعدي..

ب يوِز امواجُه..

ترقص علي رمالي..

تتهد.. طوالي..

وابنيها.. فوق يدّي..

وش السما ف الارض

..والشمس مالهاش عين..

طالع يا بكرة منين..؟

فين قِبلتك..قل لي..؟

وليّت ..سنين بسنين

ولِبست توبي حنين..

فبقيت باشوفني طشاش..

باعرفني من ضلّي..

لو انعكس..ع الضي

لو انفرد..بالعرض

لو انفرط.. كـ غُناك..

فكرنّي اني انساك..

او ارتجل عزفك..

انا بنت عمر جديد..

بكريّة ..المواليد

من حين ميلاد الآه..

شمسي يا شموسه..

يا ام الضفاير..نور

بدّلي السِنّة..

وجلجليني..شعور

قلب السما موارب..

مافاضلش غير قارب..

شايل حواديتي..

وشاددني ع الغارب

دقدق ناقوس الوجع..

وشوشني..زي الودع

واكشفني للطالع..

يا قلبي يا مبايع..

ع الصبر..صبّرني

لو غبت ..حضّرني

وازرعني.. زهّرني

واطرحني سال اخضر

العمر..متسطّر…

والخط همايوني..

علي جسمي وهدومي..

علي فرحي وهمومي..

وبانتظر… هّزة

توصلني بالمقطوع..

وتقيدني..زي شموع

في حضرة..الاطهار

الدمع..عتبة ودار

والفضفضة..غيّة

بحري اللي كان غضبان..

صافي المراكبية..

ومقّضينها..هزار.

…………………………..

طشاش

     كلمات الشاعرة 

عفاف أحمد التركى