ومات لكن,,,,,,,,

ومات لكن,,,,,,,,

كلمات الشاعرة
مرفت جابر

………..
ما ترسمنيش سوى دمعه
على خد الزمن بايته
ما ترسمنيش سوى شوكه
قطفها الحزن م الورده
ما ترسمنيش سوى نجمه
بتبكي والنجوم شاهده
ما ترسمنيش سوى غيمه
على تل الهموم قاعده
وما تشوفنيش سوى نظره
على العالم بعين واحده
ودمعه ف العيون شارده
وتنهيدة وجع طالعه
بتتصعّب على الأحوال
وتصرخ بس جوّاها
وتمشي بالعذاب أميال

م انا ف قلبي جبل رحمه
وكل يومين يشوف زلزال
بطون تولد زهور لكن
أوام ترميها ف الأهوال
فريسه ضعيفه للشياطين
ومن إمتى الشيطان ممكن
يكون طيّب وإبن حلال
وادي حاله بتلات أحوال
وغيرهم ف الوجع ملايين
تلاته ورود لكن لسّه
براعم ع الرصيف نايمين
برائه وشوشهم القمحي
لكن وسط الجُناه ضايعين
وعدّى شيطان خطف واحد
وساب فوق الرصيف اتنين
وسحبه وراح لكهف الموت

هناك بدنُه اتملا سكاكين
بدون ما يسمّي ع المسكين
أخد قلبُه
أخد كبدُه
أخد كليّه
وبات جوّه الشوال جثّه
لكن ببراعه مخليّه
وتحت الكوبري مرميّه
وناس كل اللي قادره عليه
بتتفرّج وتترحمّ
أكيد حضن التراب أرحم
وأدفى من قلوب قاسيين
ونرجع تاني للإتنين
على كتف الرصيف نايمين
يقوم واحد بفعل الجوع
يعدّي السكّه يتسوّل

وفجأه الدنيا تتحوّل
صراخ وصوات
ماهو الطفل اللي فايت مات
ودمّه اتمد ع الأسفلت
عشان خاطر جناب الست
بتركن بس مش شايفه
ومشغوله مع المحمول
وجوز الست عرض وطول
صبح همّه يفوّقها
يادوب من قسوّة الخضّه
وساب الأرض تتوضّا
بدم الطفل شئ عادي
ماهو الباشا اللي له منصب
ومين يقدر هنا يعادي
وعادي دا كلّه ف بلادي
مادام سيدنا الولي قابل

ونرجع تاني للفاضل
مازال فوق الرصيف نايم
ما قامش برغم دي الأصوات
ولا الخبطات
ولا الزحمه
ماهو اختارش موت الدم
وحَب الموت يكون رحمه
ف لم البرد بين حضنه
ومات لكن ..
بفعل الجوع
…………………………………
ديوان خليك انسان

كلمات الشاعرة
مرفت جابر