نبض الحياة جوا القلوب
حبة ورق متشعلقين
فى حبال خريف العمر
والزمن الضنين
هب الهوا.. هز الفروع
وقع غوالي القلب جوا الذكريات
بآهات ودمع الجفن
ويا العين
صبرك علينا يا زمن
يا دنيا ماتمشيش
أنا فاتحة قلبي للحياة بيكي
ومواربة ليكي الشيش
…
دق القلوب
حبة ورق متشعلقين
فى حبال ملامح عمرنا الدايبة
قلب الفرح شقق
ولا فهشي حاجة تسر
ولا يوم هلال الأمل
راضي علينا يمر
طعم الفراق واعر
والصبر عنه أمر
صاحبت ياما العذاب
ومشيت معاه مضطر
دورت يوم ع الفرح
قال الزمن دا مافيش
….
دمع العيون
حبة ورق متشعلقين
فى حبال بتسحب بسمة التوهان
آااااه يا مرار الصبر
يا ملوع النسيان
يا عاشقين الفراق
جوا حدود البوح
يا أيدين قصيرة بترفع
للسما الكفين
آه يا زمان يا طوفان
فينها سفينة نوح
ما تقولي رايح فين؟
وهجرت نبض الروح
دايرة السواقي
ومعاها كمان دايرين
سنين عذاب في الأسى
بتجر برضه سنين
رحايه تطحن ف القلوب
وتمر
تحكي عن اللى جاي
وتقول معاي ع المر
ويلف درب العمر
لكنه كان بالعكس
كاتم في قلبي البوح
ومش لاقي الدليل
غنيت لكن الصوت
كان ف الغنا مخنوق
وانا اللي ليا الحق
لكن بقيت محقوق
وانا اللي عايش سجين
الوهم والحيرة
لكن ف زنزانة العذاب
أنا حر
وانا اللي مادد إيديا وبرضه ليه
ما الاقيش
كلمات الشاعرة
فاطمةعلام… أبلة فاطمة
Discussion about this post