كلمات الشاعر
أشرف البنا
إليها_في_دار_الحق …
……………………….
الكل نام
وأنا أوراقي ماتنامش
مطاوعاني
أقول اكتب ؟ …
اقولك ايه ؟
اقول الدنيا سايباني
أقول اللحظة من عمري
تساوي سنين مفارقاني
باكلم نفسي في الوحدة
وباحكي لها
عن الدنيا معاك ازاي
وبانشر كل تفاصيلها
يفوت بين الحديث ضحكة
اكركرها … واحن لها
أحس الدقة من قلبي
تقول لي صلي وادعي لها
وقوم أفرح ماتزعلشي
ولو ناموا
أنا أوراقي ماتنامشي
*******
ساعات يحضر على بالي
خيالك لما سيبتيني
أعيد وازيد ومن فكرة
تهل أمور تبكيني
ياضى النور على جبيني
وإيه يعني تبكيني
مانا ياما اترسم ضحكك
كنبض ف قلب شراييني
وقبل سؤالي مابيكمل
يكون الرد ( من عيني )
كأن المملكة ف كفى
بإيدي عمري وسنيني
وبارجع م الخيال تاني
أقول فينك … أقول فيني
حكاوي ورايحة لسبيلها
تقول لي صلى وادعيلها
واقوم اضحك ماتزعلشي
ولو ناموا
أنا أوراقي ماتنامشي
*******
يهل علينا يوم العيد
صاجات وعجين بيتخمر
أشوف اللمة والعيلة
ناقصها دراع ومتشمر
يقسم نفحة الأعياد
يدور .. ويسمى .. ويكبر
و تيجي عينيا في عينيها
ماتستناش سؤال مني
في لحظة الحاجة تتحضر
يا بخت اللي انت وياهم
معاهم نور .. عبير أخضر
وانا عايش على الحكايات
اقولها لنفسي واتصور
حكاوي رايحة لسبيلها
تقول لي صلي وادعي لها
واقوم اضحك ماتزعلشي
ولو ناموا
أنا أوراقي ماتنامشي
كلمات الشاعر
أشرف البنا
Ashraf Elbannah
Discussion about this post