على قد عشمنا
على قد عشمنا بيجي اللوم
على قد الحب بنتعاتب
على قد الجرح بنرمي هموم
على قد عقولنا بنتخاطب
ولَكِنّ عتابي مهوش ليكي
وماعادش هواكي ف حساباتي
والحب خسارة كمان فيكي
وميولي وقلبي ودقاتي
في دروب الصعب انا عديت لك
وصبرت عليكي وعديت لك
وبدل ماتزيدي ف انصافي
بتعضي ف ايد اتمدت لك!
استاذة نجحتي ف اقناعي
وكسرتي ف قلبي بدون داعي
اديت لك ف الحب سعادة
فمليتي القلب بأوجاعي!
وحلفتي وقولتي انك ليا
واتاريني مجرد تسلية
فاذا كنت وعدتك بوجودي
مش هوفي الوعد اللي عليا
انا بس بلومك على جُملة
قولتي لي هحبك للموت
فاتبعت ف سوقك بالجملة
ومخادتش منك سحتوت!
وازاي صدقت انا دموعك
ومخادتش بالي من الكذبة
دانا ضفت رصيدي لمجموعك
فخرجت بإيدك م الحسبة!
فسلام وحقيقي منيش نادم
ياللي انتي غرامك كان عادم
مش هبكي لما تفارقيني
ولا بُعدك عني ف يوم صادم!
كلمات الشاعر
سمير محمود
Discussion about this post