غسيل ومكوة

غسيل ومكوة

………………..

جميل الحب  لو سامى

وسهر الليل لا ع البارد ولا الحامى

جميل الذاكرة لما تحط صورتها قدامى

ونتحول لشئ شفاف

وناخد الخوف غسيل / مكوة

نبخ الصمت ع الشكوى

نجيب الحزن لمس اكتاف

ونفرد عمرنا بالطول

نعيش ايام بدل فاقد ونستخرج رقم عشاق

بصورة حلوة بالألوان

وفيها المدة ممتدة ولسة الفتحة والشدة بتدى المعنى حس كمان

جميلة الحالة بتنسيك

أقله القلب بيخليك تعيش تانى   …

وبيعديك علي الأشواق تشم حنان

وتترجى من الأيام شعور صالح

يشيلك لما تبقي وحيد

يجيب لك تذكرة لحفلة …يقولك نكته على غفلة

تموت م الضحك ترجع تانى تبقي شباب

جميل الحب لما بيلطعك ع الباب وتتصنت علي روحك وتسمع من بعيد بوحك

وتستغرب  انا ازاى لسه معرفنيش

تكلم نفسك التانية اللى عاوزه تعيش

يشوفك ضى من عينك  بيتسحب وجاى بشويش…يقول مجنون

تسايسه عشان يصون سرك ..تلح عليه تبان مفضوح

جميل الحب لما يكون له باب مفتوح

وفيه فرصة  فتتلم السعادة عليك

وتعمل دوشة تملا عينيك

وتهتم بساعات كانت زمان بتعدى  ورا ضهرك

ولا حتى بتخبط فيك

جميل الحب بينقيك..وينقض فيك

يجيب الحلو علي وشك عشان يغريك

وبيلم الوجع يرميه

وبينادى بعلو الصوت هنا عاشق

فتتلم العيون حواليه

جميل الحب بس شحيح

وكل اللي احنا شايفينه ف كراتينه

مهوش بلدى ومروى  بزيف

وحضنه الشتوى بالعافيه طلع ف الصيف

يادوب منظر ومن بره..

.لكن من جوه شكله قبيح

كلمات الشاعر

حمدى موسى