ما بين سطرين

ما بين سطرين

أنا حقيقي مفيش جُوَّايا ولا كلمة تقول انِّي باعيش فِ حياة

انا جُوَّايا ألفين آاااه

وكام تَنهِيدة علىٰ كِيفَك

شِتايا يُخنُق الكلمة وصِيفي

أكيد ما هوش صِيفَك

وحُزني لوْ يلِف الكُون

هايتْفَرَّق علىٰ اصحابُه

ويهدي الحزن والآهات لكل قَرايبُه واحبابُه

أنا في غايِةِ الدمعة الِّلي مَنْحوتَة علىٰ خدُودي

وفُستان الأسىٰ محَبِّك تمام الحَبْكَة علىٰ عُودي

أنا الروح الِّلي هَزمُوها

وطَفُّوا حُزنُهُم فيها

فامَتْلُومْنِيش عشان يَعني مابَكْتِبشِ

أنا أصلًا ما نِيش حَيَّة حياة بتِمشي

أنا واقفة ما بين سَطرين

بينزِفوا غُلب مِتطعَّم بآه ومُرِّين

أنا جِسر انْقَسَم نُصِّين

كلمات الشاعرة

منى عبد الرحمن