بني شياطين
حلوة الحياة؟
حلوة
بس من غير ناس
حلوة البشر؟
جداً
بس من غير روح
صعبة المعادلة يا صاحبي صدقني
و اسهل ما فيها انك تبات مدبوح
من مين؟
لأ إوعي تسأل مره نفسك مين
مش كل ناس بتشوفها بني آدمين و لا اي بني آدمين تنفع تِعاشرها
الإنسانية؟
جميلة اه جداً
بس اما تلقي في نوبه مَعاشرها
و الحلو حلو بس الزيادة تِجزع
و الصحبة وقت تدوب و تتمزع
و إنتي و عنيكي تغوروا و ف داهيه
مش كل سطر اكتبه
تردي ب الناهيه
و لا كل حاجه هعيشها علشانك
النص حلو و هادي في البدايات
بس انتي جيتي ف بالي قام هانك
زي اما هونت عليكي 100 نوبه
و زي الرطوبة بتاكلي ف دفايا
كان نفسي اهون ع الكل إلا انتي
كان نفسي اكون ف الجاي ضحكايه
مش كل حد نحبه بنطوله
و مش اي حد يحبنا يطولنا
مش عدل خالص يوزنوكي كلام
و تطبي غصب في كفه خسرانه
مش عدل خالص ناس تحب ف ناس
و فيه ناس تنقي في بيعه ربحانه
مش جاي اقولك اني حبيتك
و لا جاي اجيبلك دبلة و غويشه
انا جاي اقولك اني مش شايفك
و لا حتي شايفك جنبي غير ريشه
عدي الهوا طيرها حبه ل فوق
يهدي الهوا ع الارض تنداسي
عمر السيجارة اطول كتير عنك
بس التشابه بينكوا تتباسي
عقب السيجارة بيترمي ع الارض
اما انتي لاجل انا برضه متربي
هفضل اشيلك ملكه فوق راسي
خدني الكلام و الشعر و المضمون
قلبك جميل يا حليوة لو مركون
و مهزيتوش في السكه للعابرين
قلبك جميل يا حليوة و الله
بس انت ظالمه ب حب بني شياطين
كلمات الشاعر
فارس ابو تريكه
Discussion about this post