كتبت الشاعرة سناء البنا … (قدرت خلاص)

💥قدرت خلاص💥

وقدرت خلاص تبعد عني
تنسي اللي كان وبتهملني
يا خسارة العشرة الحلوة
ايام ما كنت تكملني

الحلم بينا كان يكمل
والكلمه سوا كنا نقولها
والليل معانا كان يسهر
ونجومنا يا محلا ظهورها

مين كان يشوفنا ولا يغيرشي
كانوا يحسودنا ع هوانا
لكن اخاصمك مقدرشي
لا انام ولا عمر النوم جانا

يبقى يا غالي يكون ذنبي
تبعد وتعند ويايا
وكل دقه كدة ف قلبي
تندة باسمك يا منايا

وقدرت تبعد وتسبيني
وقدرت بالنار تكويني
كنت بتقول يا حبيبتي
دا انتي وجودك يحييني

خلاص كفايا الله يسامحك
علي الدموع اللي ف عيني
وانت اللي قدرت كده بغدرك
تنسي اللي بينا تجافيني