أحلفلك

أحلفلك

……..

حاولت كتير ..

أخبّي الحب جوايّا

واصد جيوش غرام حُبك

حاولت اقفل ببان قلبي

ومهما تدق ما افتحلك

حاولت اهرب من الأحلام

عشان أبعد خيال صورتك

حاولت اسكت كتير جداً

عشان ما انطقش يوم إسمك

حاولت اخرج من البرواز

واغيّر صورتي ف عيونك

لقيت ف مراية الأيام

ملامح روحي تشبهلك !!

وباحلفلك …

جيوش دفاعاتي مش قادره

تصد هجومك الطاغي

ولا قادره تفك حصار

عيونك نظره واخداني

ف بحر الشوق مع التيّار

وموج الحب طوّحني

ما بين حضنك بلا إنذار

بقيت محتاره مش عارفه

دخلت الجنّه واللا النار

وليل ونهار …

ما بلمحشي سوى طيفك

سوى صورتك

سوى حضنك

بقيت مسجونه ف حدودك

وأغرب شئ ف دي الحاله

بقيت عاشقه حدود سجنك

كأني من بداية الكون

وجودي ف الحياه منّك

وباحلفلك ..

بقيت ندمانه ع الماضي

على هروبي

على بُعدي

على إنّي ..

حاولت اقفل ببان قلبي

واصد جيوش غرام حبّك

أنا ندمانه ع الفايت

عشان عشته بعيد عنّك

ولو عاد الزمن بيّا

ح اقضّي ساعاته بين حضنك

وأحلفلك

كلمات الشاعرة

مرفت جابر