بنعيش

بنعيش فى الكون المفترض

ونطير من غير معنى وغرض

بجناح وريش

وسنين مافيش

لا بنشتكي ولا نعترض

*

كل الاماني مبعتره

كل المعاني بدون حروف

وحياتنا زي المسطره

بنعدّي خوف ندخل ف خوف

حبّة حاجات مترتبه

وكتير حاجات متكركبه

والأسئله والأجوبه

لا بتتقبل ولا تترفض

*

ف البحر تايهه الأشرعه

ف البر غرقانه الدموع

نتمنّى بعد الزوبعه

نلمح ف ضلمة ليل شموع

أحلامنا  ما تبقاش بنت موت

ولا مد بيهد البيوت

دي الأهه بتهد السكوت

مابين أنين وأهات مرض

………………………..

كلمات الشاعرة

رضا انور