بقلم الشاعر … الحن طليس
وصية لولدى …
بوصيك ياولدى
واعمل للوصيه حساب
امشى على قدك
وفصل التوب
يكون مسبوك على قدك
وإن شيلوك حمل
شيل الحمل على قدك
واذا اردت النسب ع الأصل دور
تلاقى الجد مين قدك
مادام حبايبك تحبك
يبقه مين قدك
بعزم الروح كمان حارب
وخبى الحزن جوة عينيك
وحط البسمة
بالعافية على خدودك
ورغم الهم فوق كتفك
تقيم عودك عساك ترتاح
الكل هيزول
ولادايم غير المعروف
ازرع جميل تلقاه
هيردلك تانى
من نوع ماتزرع
مؤكد راح تكون جانى
والشعر لوشاب
لم يرجع شباب تانى
اللى سبقنى فى درس الدنيا
ياولدى
وصانى وقالى اصبر
وبالمعروف يروق بالك
الدنيا مش مستاهله صراع
ومش مستاهله خناقات
كفنك مش بجيوب
ولاينفع تاخد حاجه من الأيام
واللى بتفضل هى السيره
وبيها بيفتكروك قدام
مهما ان كنت بسلطه وعزوه
برضوا هتنزل تحت لوحدك
وهيرموك ع الرمل الناعم
يفردوا جسمك وانت تنام
مين ياولدى كمل بفلوسه
ومين اشترى صحته بالجاه
مين مجالوش الموت واصطاده
وسابوه عشان فيه عزوه معاه
واوعاك ياولدى
تلعب مع الدنيا
على المغلوب
لأن مهما كنت شاطر
هتطلع مغلوب
وهتسيب كل اللى كسبته
على الترابيزة وهتمشى فاضى
زى ماجيتها فاضى
بقلم الشاعر … الحن طليس
Discussion about this post