الناس حزينة ليه؟
بقلم الشاعر … محمد ضباشه
عضو اتحاد كتاب مصر …
الناس حزينة ليه؟
واليوم ما لاقى عينيه
قطر الحياة كان فات
ما لحقنا نركب فيه
لما بقينا رفات
وسكوت مغطى عليه
هو احنا فينا أيه؟
والناس حزينة ليه؟
سوق الفرح متباع
للى عليه الدور
والهم كان ملتاع
يحضن حيطان الدور
الدمع عاش سواح
بين الجشع والزور
حتى النهار ما ارتاح
فوق الكتاف نبكيه
هو احنا فينا أيه؟
والناس حزينة ليه؟
يوم الفرج مالقاش
مركب يعدى عليه
طلع الأمل بكاش
رقاص بينخر فيه
سقف الطموح ما علاش
ليوم حياة نلقيه
ماسح دموع الناس
والحب فيه يحليه
هو احنا فينا أيه؟
والناس حزينة ليه؟
شقشق يا فجر الناس
وادن صلاح اليوم
رجع إيدين الفاس
اللى خطفها البوم
يمكن يعيش محتاس
عريان مالاقى هدوم
ويفتح الترباس
يلقى الربيع حواليه
ولا احنا فينا أيه؟
كارهين وجودنا ليه؟
Discussion about this post