جلا جلا …
بقلم الشاعر … محمد ضباشه
جلا جلا
قرب وحل المسألة
يا بن العرب
يا للى انت مستنى الأمان
من قوة تترقص هرب
مين السبب فى اللى احنا فيه؟
مين اللى داس فوق الكتب؟
مين اللى باع فكر الدماغ للألعوبان؟
اللى على دماغ الشيطان
بيرخ نار فوق جهلنا
تهدم ديار
كل اللى عاش فيها مُهان
واحنا السبب
خدنا قطار الفُرْقَة لليل والضياع
نعجن تراب الخوف وطن
ونقسمه زى الميراث
كراسى نايمة ع المشاع
بين الوهن بتقول أنا
رافعة شعار إحنا العرب
أمة صلاح
واحنا كتابنا قام كفر بينا وناح
لما الحمام فينا انقتل
لما الخصام شعلل قوام
والحبل بينا انقطع
لما الفصول صارت طبول
تلغى عقول جيل انشغل
برغيف حياة
وجيل ما لاقى فى الكتاب
شبرين نجاة
وجيل خدوه بين الدقون
وعلموه ازاي يخون
وان الوطن هو الأمير
والموت شرف لو كان فداه
والديب ذكي
فرق ما بينا بحرفته
عشان يسهل لقمته
لما بقينا ع الورق
قلعة ثيابها للعدو
أرض الحفاة
من كل يد بتشتهي
تقطع رقاب ليل البغاة
Discussion about this post