قمة بلا نبوت …

بقلم الشاعر … محمد ضباشه 

 سألت العقل عن قمة

فقال لى يوم وهيعدي بلا نبوت

ولسعة سوط يخاف عتريس

ويجرى القرد يدارى

ف حضن الموت

لا فى ناجي بقى ناجي على حرافيش

ولا عنتر بقى عنتر عشان غزة

ف حالها تعيش

ولا حبلى يجيلها الطلق فى النخوة

فتولد جيش يكون قمة

بلا عمة بتتعايق بعلو الصوت

ولا صورة تبان الأمة مكسورة

وعين الشمس مقهورة

ما بتشوفشي

ولا تسمع كلام مظبوط

فى قمة كات بتتاوب على مركب

بيترنح خنوع وسكوت

ما يوصلشي

لأي قرار يكون رادع

يصد الموت

هنا قمة بلا عيلة أكلها الحوت

هنا ضمة ما بتضمش سوى أحضان

وكام بوسة وبسماية

مع غدوة ما بتغديش دراع بيفوت

ف قلب الصخر ما يخلى كيان هلفوت

يكون له نهار

هنا قمة لشعب انهار

وفيها اليد مبتورة

لا هتقدم ولا تأخر

فخلينا ما نتأخر على دموعنا

ولا نرجع ما نلقى الدار