اللي باح بالسر كان قاصد نهاية …

كلمات الشاعرة

عفاف أحمد التركى

اللي باح بالسر كان قاصد نهاية ..

واللي نكّت كان مبّكت في الحكاية ..

واللي وتره اتشد فجأة .. وقال غُنايا..

واترسم ع الحيط خيال..

كان خيااااال

..فاحت صدر زمانُه ليل

كان مَحااالة نسد شقُّه..بالدليل

كان قليل البخت .. وكتير الهداية

كل شطحَة يروح معايا..

بس ما بيرجعش تاني..

معجباني ..وكعبُه اعلي م الفواصل..

م اللي قاله..وقلنا حاصل

م المقاصل وانتهاج الدقدقة

وانفعال الروح وتنويح الشقا

وامتثالك شبه عاري قصاد عينيك..

لمّا تنعاد الرواية ..

لمّا تتوّدك مشاعرك..تحترف قصف الجباه

لمّا يتفّك المسوجر ..وانت علي،قيد الحياة

لمّا بعد الغُلب نرجع للبداية….

لسه ما اختارتش كناية ..تُجُب ما قلناه زمان

لسه ما وصلتش قراية ..تقِرن الجاي باللي كان

لسه شايفة الفجوة واسعة ..

ناشعة جهل علي،الحيطان

ما اقترفتش ذنب غير ..

..كل ما اوصل للوسيلة

تنفجر جوايا غاية..

كنّا قبل الموت بخطوة .. لسه عاميانا الغواية

فكان طبيعي الاختلال يوصل كعابنا..

والسؤال يطرح جوابنا..

والعيال تدور ورانا ..تزّف اوجاعنا وتعبنا ..

ونبكي حالنا.. في حضن آية

كنا بعد الموت ..هناخد بالنوايا..

او يجوز ..

الموت يفِل تحويشة الحواديت ..بُكا

يسوسن المنامات …نايات

يعترض علي نظرة شايلة الدمعة..

ماشية من سُكات..

يفترض جدلاً..وافترض.. انك ( معايا )

اللي باح بالسر ..كان قاصد نهاية

واللي نكّت كان مبكّت في الحكاية

واللي وتره اتشد فجأة..وقال غُنايا

واترسم ع الحيط ..خيال

كااااان..خيال.

كلمات الشاعرة

عفاف أحمد التركى