كلمات الشاعرة
ميمي محمود عبدالجليل
.ماله !
بان عليك السن حبه
بطل الشوق يستخبي
والأماني اتبدلت
عجزت
مبقتش شابه
طب وماله
كل وقت وله حلاوتة
كل سن وله جمالة
وانت عشت العمر كله
بانفعالاته ودلاله
فيها ايه لو شفت نفسك ف المراية
والتجاعيد ماليه وشك
فيها ايه لو تكتشف أن الصحاب
كل يوم واحد يغشك
فيها ايه لو هدوا عشك
طب ومااااله
فيها ايه لما يبيعوك
يخدعوك
كل فرصة تيجي ليهم للخيانة
بيخونوك
فيها ايه لو يوجعوك
قول وماله
لما كل الناس تنام
وانت تسهر ليل بطوله
عقلك الموجوع يفكر في ال ظلمك
ايه دليله
والدموع ملهمش حاكم
دايرة تجري فوق مخدات الليالي
دايرة بتناكف ف قلبي تفكره
باللي جراله
تحرمه م النوم دقيقة
تصدمه تقوله الحقيقة
كيف تنام الليل ياقلب مكنش خالي؟!
كيف وليه وازاي آمنت لناس هفق
ملهومش غالي
فيشاركها دموعه يحكي عن شجونه
يبكي قمره معاه وتتنهد نجومه
طب ومااااله
م انت م الاول رضيت قلبك يصون
م انت م البدايات عايشها بالأصول
ليه قبلت الكل لعيونك يخون
م انت ضحيت وارتضيت
انت بس تكون حنون
م انت كل دقيقة تتوجع تقول
عمر م الغالي يهون
يبقي كفكف دمعتك
وانسي العتاب
انسي مين قطع شرايين المحبة
وال دوقك العذاب
وانسي انك حتي تسال
مش رح يجيلك جواب
سجل الغاليين في قلبك
بالمحبة
والبواقي
اعتبرهم
في سجلات الغياب
كلمات الشاعرة
ميمي محمود عبدالجليل
Discussion about this post