. فلسطين
يانبض الحواري
وجرح السنين
وألمي اللي ساكن ف روحي انين
وجرحي اللي مد
ف ليل الحصار
برغم التحدي ورغم الدمار
بحبك بجد
وبالمس ف ريقك بريق النهار
مع إن ريقك
مبلش حوافر شراقي حروفي
ف زوري المشقق
ولا حتي نبت ف حلقي اخضرارك
باعاني لإني من صفر سني
شارب مرارك
وقلبي اللي مل انتظارك بيغرق
وإيه بس يفرق
مابيني وبين اللي ضمك غوايه
وبين اللي يعطش
ولحظة مايشرب هواكي بيشرق
بحبك بجد
وباحضن ملامحك ف طيف الصبايا
وظل انكسار البراءه اللي طاله
ف عين الصغار
باشوفك ف ضحكه بطعم الألم
واحسك ف دمعه في عين اليتامي
ف وقت المهانه والانكسار
واحسك جدار
بيفصلني عني ويهمس ف ودني
بإن اللي باقي مجرد خيال
وان الحقيقه ف بير التمني
مجرد شيطان
بيجمع قلوب اللي ضلوا الطريق
وان بإيده جميع الخيطان
وان السفينة اللي بحرك شاربها
كانت عجينة ف إيد الزمان
وان اللي حبوكي قبلي
ودابوا ف حبك وشافوا المرار
مجرد هوامش ف قايمة خضوعك
وان رجوعك محتاج قرار
بحبك بجد
وفاتح ف قلبي مداين لقاكي
وراسم حدود التلاقي ف روحي
ونازف ف دمي عبير اشتياقي
واحس بخطاكي بتدبل جروحي
ويملاني خوفي عليكي تروحي
ويملاني خوفي عليكي أحبك
واكتف عيوني بطيفك ملاك
وفجر بيفرد مداه ع الربوع
برغم التحدي ورغم الهلاك
يعافر يقطع خيوط الشباك
ويفتح بيبانه لصبح الطلوع
بحبك بحد
باحبك وراسم طريق الخلاص
باحبك وراسم طريق الرجوع
كلمات الشاعر
نسيم الزراع
Discussion about this post