كلمات الشاعر
وحيد علي الجمال
(( بيب بيب ))
كان ممكن اصدق ان الشعر
وأهله وناسه وكل جيرانه
افظع في ذنوبهم بمراحل
من عاد وثمود ومعاهم
اصحاب الاخدود
ملعون الكاتب والقارئ
لو شاف اخواته بيندبحوا
وينام مبسوط
من غير مادماغه من المشهد
تغلي وتفور
ايه مانع قلمك في الأزمة
يصرخ ويثور
ايه فاضل تاني في كرامتك
علشان تخرج وتهد السور
والكل اهانك واتهمك
عايش طرطور
انفض في سطورك يا صاحبنا
خليها تشيل طلق كلامك
حولوا لبارود
إعلامهم كدب وكله ضلال
وسلامهم غدر وكله حصار
اوعي تصدقهم تاني في عهد
أو تحلم تاخد منهم وعد
ملهمشي امان
مركبهم غش وكله عيوب
وكلامهم كذب ومش مفهوم
شريعتهم تفضل فيك مهزوم
يغزل ويضفر في حروفك
ويسيبك وانت اكيد مرعوب
يجرح ويجرح في جروحك
يكويك وبيكوي كمان روحك
وانت بتزود في دموعك
وتقوله كمان
بتنادي عليه تتمني رضاه
ويزيد غطرسته ويهينك
أصبح مرغوب وانت المشطوب
وفي كل طريق ممكن تلاقيه
بصراحه انا قلبي وكلني عليك
اهرب م الشعر وسيب أراضيه
خلص روحك منه وعاديه
الكرب بيسكن تفعيلته
والقافية بتعزف في نغمته
وبيسحر بجماله ودانكم
وبيخطف اجمل مشاعركم
ويسافر من غير ما يقول
رايح على فين
بدلك بدل السبحه ذنوب
والتوب معيوب
لو مس لساني بسرعه ب أتوب
واستغفر منه واكون مخضوض
ماهو لازم بعد المس وضوء
واعتزل الشعر واكون مجذوب
كان وارد جدًا اكون عفوي
واصدق كل اللي اتقال لي
واكفر بالشعر واكون دموي
انا شاعر واقف آخر الشارع
برسم لك صورك يابلادي
من قلب النابض باشاعه
تظهر مع نار الولاعه
وفي وسط ضباب
طفيت وانا بحلم بوجودك
يجي الف سيجارة بدخنها
زادت ضلمتها مع العتمة
لو أمكن أعيد اخر مواعيد
وابدل صورتي على كتابك
يمكن تدوينك لي غيابي
يهدم فيما بيننا جدار الصمت
أو حتى في غفلة اشاراتي
يوصلك حتى دبيب الهمس
لو ينفع أبطَّل فيك العشق
إنشالله أبطَّل فيك الشِعر
وانزل في البحر اجمع موجه
وأسيب لدموعي الفرصة تسيل
من غير تراتيل تحكي التفاصيل
ويموت الدمع في قلب العين
محبوس مع روحي بقى له سنين
والقصة بيسكنها المجانيين
وبدَوِن اسمي مع المجاذيب
وبغني وبجري وقول بيب بيب
كلمات الشاعر
وحيد علي الجمال
Discussion about this post