كلمات الشاعرة
حنان شاهين
مش عاجبني اللعب
فركش
عايزة العب لعبة تانية
لعبة خارجة عن قانون الضرب في الحلبة المميتة
و الصراع الحتمي فيها عشان اعيش
لعبة حلوة ما تنتهيش
لعبة ابقى فيها روح
بس روح
و لو ضروري يكون لي جسم
يبقى جسم خفيف عليا
جسم خارج عن قانون الجاذبية
جسم هارب من قانون الوقت خايف م التروس
كل ترس يفوت بيطحن حاجة فيا
حد يحدف طوبة يكسر
عقرب الساعة الغبية
عايزة اعمي عينيها
و اهرب منها مرة
حد يرمي ستارة سودا عالمجرة
عايزة افتح عيني اشوفني
طلعت بره
من يمد ايديه لقلبي بورقة بيضا
عايزة ارسم لوحة تانية
لوحة فيها الضل دافي
و الاضاءة تكون خفية
لوحة فيها الروح فراشة
لما يدبل عطر وردة
يستمر في وردة تانية
لوحة ابقى فيها نقطة
في الفراغ
اللي حابة يكون نهائي
روحي تعبت
م المسافات البعيدة
و السؤالات العنيدة
و الاجابات البليدة
و الأبد
و السرمدية
كلها استعصت عليا
روحي تعبت
م البدايات البريئة
و النهايات الغبية
من يمد ايديه لقلبي بورقة تانية
عايزة اعيد شكل الحكاية
مش ضروري فيها حبكة
و خير و شر
مش ضروري تكون في حلبة
المصارع اللي فايز فيها
مصروع في النهاية
مش ضروري ان السيناريو الحتمي
فيها ينحصر
بين ميلاد
و صراع
و موت
مش ضروري الناس تموت
مش ضروري للحكم صفارة يرهب بها روحي
و لو ضروري نبدل الصفارة بس بصوت كمنجة
أو فلوت
..
فركش المرة دي بس
و بكرة نلعب لعبة تانية
في الحقيقة هي هي
نفسها اللعبة القديمة
تبتدي بشموع و فرح
و تنتهي بصفارة تعلن عن هزيمة
كلمات الشاعرة
حنان شاهين
Hanan Shahin
Discussion about this post