كلمات
الشاعرالغنائى طه علي الدين
( فاكره زمان )؟
……….
فاكره لما كنا زمان
وسط الغيطان
نقعد و نحكى لبعضنا؟
يااااه ع الزمان
كان من زمااااان
كان لما كان
لا هى انتى و لا هو انا
كنا نصحى من الفجريه
نشم النسمه هاديه طريه
بعرق الندى متوضيه
نتوضا و نصلى جماعه
و نسرح ساحبين بهايمنا
عاملين مذيعين فى اذاعه
و لا حد فى الدنيا هاممنا
اللى يقلد(شيخ عباسط)
و اللى يقلد فى (الطبلاوى)
و قول ياباسط تلاقيها هاصت
و لجل النبى لل (الكحلاوى)
و نربط مواشينا فى مراودها
تصبر لحد الندى مايطير
و اما البرسيم كان يراودها
نحشلها يادوب غُمرين
على عودين دره م المتلقط
تاكل بهايمنا تزقطط
و احنا نلعب نتطط
مع بعضينا اتنين اتنين
اللى يرسم فى (السيجه)
و اللى يقفز فى (الريجه)
اللى يفتحله فى سهرايه
و اللى متغمى بغمايه
و نجرى نهرب فى اى مهرب
و قبل الرِد حتمآ لابد
يمسكله واحد مننا
يااااه ع الهنا
لما نلم بعضنا
و نفك مناديل الغدا
و نتشارك و نتعارك
احلف عليكى وتحلفى
و تغمضى و تسلفى
ماياكل غداكى إلا انا
و بعد الغدا…
و اللى كوع و اللى نايم
و اللى قام يسقى البهايم
و اللى قال حبيب و هايم
تقولشى طاير فى السما
و اللى بيخطخط فى خطوط
و اللى بانى ب طينه بيوت
و اللى طالع شجرة توت
قبل ماياكل يحدف لنا!
يااااااه ع الهنا
لما الشمس كانت تحمر
و نهم علشان هنروح
قلوب بريئه ماتعرف شر
الخير معاها اللى مروح
ع الطبليه فى المغربية
العيله تقعد تتعشى
و بعد مانحمده نتمشى
و من التعب نرجع و نام
لا نتغطى و لا كان فرشه
و كنا نورب فى البيبان
اصل الأمان كان من حنان
حضن ابونا و امنا
و كل كبير كان له مكان
و الخوف ماهوّب يمنا
ياااااه يا أنا
يامين يرجع عمرنا اللى انحنى
فى العولمه و الهيمنه
يا ألف طز
دى ساعة الحظ مايساويها ميت سنه
ساعة الحظ ماتساويها ميت سنه.
كلمات
الشاعرالغنائى طه علي الدين
Discussion about this post