عتمة الفجر … بقلم الشاعر فضل عثمان أبو حريرة

الليالي تمر سهلة
وليلك انتي ليه مطوّل
سد نور الشمس
ياما
والملامة
على الغلابة
اللي فرحوا
لما قالوا لهم
هنخلص
م الديابة
راح تعيشوا
في ليل جميل
ليل طويل
فيه أمان
فيه سكينة
تختلوا بحبايبكوا فيه
تلقوا بحر الشوق طحينة
في الليالي الحلوة دايماً
فيه مجون
فيه جنون
في الظلام
تقضى الحوايج
للي شعنون
واللي هايج
واللي بيسلك أموره
واللي ياخد .. قبل دوره
واللي بال ” تيك توك ”
بيكسب
حتى لو باع عرضه وضميره
…
كل دا من غير ظلام
مش هيحصل
كل أبواب السعادة
في وشكم لازم هتقفل
يبقى حافظوا ع المكاسب
واعرفوا مين اللي حاسب
مين بيدفع دم قلبه
عشان تعيشوا ..؟
هو بيجوع وانتوا ..
تاكلوا عيشه
اعرفوا قيمة حبيبكم
نور عنيكم
اللي باع نفسه عشان ..
يشتريكم
الظلام هو الحياة
والليالي للنجاة
أوعوا ضوء الشمس يخدعكم بنوره
أوعوا يوم تكفروا باللي انتوا فيه
أو يوم تثوروا
أوعوا تنسوا طول حياتكم
إني أنا خيري عليكم
واللي ربا هو أولى
بلحم توره
…
تذييل :
مهما كان الليل طويل
لابد دايماً يكون له فجر