بقلم الشاعرة … ناديه عبد المحسن

رسالة إلى …

على الشاشة كلام بيئن

وكام صورة كاسيها الحزن

خمس لايكات وهاي مع قلب 

   نتعرف ؟  

أنا واحدة لكن مش مِنّ

ولا بشبه بنات جٍيلَك

ولا دمعة ف منديلك

ولا شمعة ف قنديلك

ولا وردة تغنيلك

إذا ليلك كان محتاج لأغنيه

صدقني أنا يا سيدي مش هي 

ولو حرفي لمس حالك

ف ليه ترسمني ف خيالك

عروسة البحر ف الحواديت 

وجوه تابوت اكون ضحكه وجنيه 

أنا كلمه ف حضن الشعر

رماني الحرف ف الميا 

بدون مجداف

وشمس ورافضه لحظه  

تحن لغروبها

دموع تايهه ف ليل خواف

أنا كوكتيل من الأوصاف 

سطور عايشه ف زمن التوك 

أنا الورده اللي عايشه بشوك 

وحلمك بيا لازمه بلوك

رسالة وقاصدة اقولهالك

ممنوع الكلام ع الخاص لأمثالك

بقلم الشاعرة … ناديه عبد المحسن