كلمات
الشاعرة … يامنه اليمنى
وتتسرسب حلاوة الحلم
ـــــــــــــــــــــــــــــ
وهى حياة
نعيش العمر وبنلقاه
ونتمنى فرحنا معاه
وبحلم كف م النونو يواسينى
يقول ياماما ضمينى
وانسى الماضى والحاضر واعيش لجل أكون وياه
وتكبر قد ما تكبر
حتفضل طفل ياصغير
وحفضل برضوا اتمناه
ومين فينا بينسى ضناه
ومين فينا برغم الفرح ناسى الأه
وحعمل ايه
مادام أيامى نسيانى
عاجبها الجرح وزمانى
دا بيقول لى حصادك هم
ومش ممكن تكونى أم
وكل ما تيجى نطفة دم
وتلعب ف الحشا مرة
اقول هانت
حيجى ضنايا يحيينى
وتاسع شهر يرضينى
واولع ف السبوع شمعة
وقطرة فرح تروينى
وامنى الروح واستنى
يادوبك شهر والتانى
وتتسرسب حلاوة الحلم
ف الاقينى
أعيد الكرة واتحايل على المكتوب
سنين وانا صارة اوجاعى
كما «ليَّا»على«أيوب»
كإن عذابى من إسمى
بيرفض انى اشوف إبنى
مايلحقشى بصيص النور
يحسسنى
بإنى خلاص بقيت باشبه إزاز مكسور
اراضى وبور
ورافضة انها اتنبت
ولو شاتله حنين شايك
ياريت يابكرة ياللى جاى
تجيب لى م السما بشارة
تعوضنى عجاف أيام و حتعدى
ف ماتلومونيش
وانا ودّى ادوق مرة رحيق شهدى
واكتب لك حروف سعدك
لكن هيهات
دا امر الله ماهو بيدى
…………
كلمات
الشاعرة … يامنه اليمنى
Discussion about this post