كلمات الشاعرة
حنان شاهين
ازاي عرفت السكة وحدي بدون دليل
و كاني كنت في يوم هنا
مريت على نفس المكان
و كاني عشت اللحظة دي من ١٠٠ سنة
فيه روح غريبة كانت هنا
انا حاسة بيها و سامعة انفاسها
لمحة بتضوي في عيني
و تختفي في لمحة
صوتها ساعات انا باسمعه يبكي
و ساعات يكون فرحان و بيغني
و القي خطاي تاخدني يم البحر
فيه صخرة غارز نصها في الرمل
محفور عليها كلام
يشبه اوي للشعر
متحاط بدايرة كبيرة تشبه قلب
مكتوب : انا حبيت و خانوني
الصخرة دي تشهد على وجعي
ليه دمعة لمعت فجأة في عيوني
و كاني عشت معاها محنتها
أيه اللي جابني الليلة نفس المكان
الشط خالي م البشر الاي
عرافة ظهرت فجأة في المشهد
همست في ودن الريح نبوءتها
صوتها قريب رغم انها بعيدة
قعدت توشوش للودع بكلام
( قدرك هنا و برضه هناك قدرك )
(البحر شاهد زور على دمك)
(بعد اكتمال الدايرة نقصانها )
حسيت برعشة غربية من قولها
فجأة لقتني وحيدة وسط الشط
هي حقيقة و لا انا اتوهمت
القصة دي انا عشت تفاصيلها
اللحظة دي انا عشتها من قبل
عرافة باحت للودع بالسر
البحر هاج فجأة و علي عالشط
مقدرتش اهرب
و احتمال سلمت
و الموج بيعلى و يعلى حواليا
و ايديا تضرب عكس رجليا
فيه شيء غريب بيشدني للقاع
اسبح بسرعة بعزم ما فيا
اللحظة دي انا عشتها من قبل
فيه صوت بيهمس قربي
ياللي انت موتك فيه حياة ليا
اللحظة دي انا عشتها من قبل
و كأن روح تانية
عاشت زمان فيا
و كأن فيه عالشط
جسد جديد بانتظر
اني أعود ليا
Hanan Shahin
Discussion about this post