بقلم الشاعر … هانى صلاح الدين

برجين حمام …

الملامح عجزت قبل الأوان

واللي فاضل منها دمعه من زمان

عِشنا بنداوي في جروحنا

تبكي تصرخ فينا روحنا

واهي عيشه والسلام

الملامح عجزت قبل الأوان

كُنت لسه طفل بلعب

وافضل أجري لحد ما أتعب

وأما كان الليل يغيم

كُنت أروح في سريري أنام

كُنت صوت مزيكا حلوه

كان في قلبي ألف غنوه

عِشت عُمري وكُنت راضي

فجأه ضاع مني السلام

كُنت صوره لشاب صالح

والطموح برجين حمام

كُنت أصلي الفجر حاضر

وأبكي لمّا أسمع أذان

ياما قالي الشيخ محمد

أحفظ القرأن كمان

سيبك إنتَ م الاغاني

عدي من فتن الزمان

نفسي يرجع تاني عُمري

نفسي أعيد بعض الحاجات

أبكي وأمحي الف لحظه

من سجل الذكريات

نفسي تاني تعود ملامحي

تشبه العُمر اللي فات 

حاجه ضايعه بقالها مُدة

مش هترجع غير بسجدة

يلا بينا العُمر عدااااا

الف واحد غيرنا مات

الملامح فيها قسوة

الملامح انتيكات!!

لسه روحك حلوة جداً

قادره تصنع مُعجزات

رجع الضحكه الجميله

يرجع القلب اللي مات

بقلم الشاعر … هانى صلاح الدين 

Hany salah eldin