وحشتينى

كلمات الشاعرة
فاطمة علام

ما بين لهفة لهيب الشوق
وبين وجد انتظار طيفه
يجيني ولو ف أحلامي
بغمض عيني بالتنهيد
لقيته ف ثانية قدامي
وقالهالي:

وحشتيني
برغم إنه ماقالهاشي
حروف وكلام
لكن قالهالي بعيونه وحسيتها فى رعشة
همسه وسكونه
لمحت اللهفة في النظرة
بتصرخ… صوتها حياني
وردت جوا قلبي الروح
وورد الخد فتح بالأمل تاني
يطيب فى الوجع ويشد
على قلبه اللي كله جروح
أمانه تقولها وتعيدها
دا أنا روحي يا روح روحي
لقت بالفرحة يوم عيدها

وحشتيني
يا نن القلب من جوا
ياحب بيدي قلبي حياه
ويملاني بحور قوه
بنيت لك فى الليالي أحلام
وحلفت العيون ما تنام
وتستنى
يسمعني ويهمسلي
بأحلى كلام
وحتى النوم ما يحلالي
غير اما اسمعها من قلبه

وحشتيني
وألمس ضيه بجبيني
واقولها له بعلو الصوت
يا ضي القلب والملكوت
بحبك حتى آخر العمر
بحبك لو بعيد عني
بحبك لو قريب مني
بحبك بعدها لو اموت
دا موت العشق
أحلى حياة

كلمات الشاعرة
فاطمة علام

أبلة فاطمة