كلمات الشاعرة 

فاطمة علام

 أحلام القلوب …

وفين الود والإخلاص؟ 

شاورلي يا خلي بس عليه 

وفين الحب ياابن الناس؟ 

وأنا وقلبي هانجري عليه 

 دا انا قلبي بقاله سنين بيتألم

ويتعذب 

وبدموعي بجبر فيه 

يا دوب متسنده حيطانه 

على أمل إن جاي له خير

وعشمته بعطف وشوق

وبحر من الحنان يرويه 

سقاني المر ألوانه 

وشفت الدمع مالي عنيه 

برغم اني 

لا جيت مرة بنيت فى قصور

 ولا حلمت إن انا والشوق 

هانسكن فيه 

خيالي كان على قدي

  يا دوبك ضل شجرايه 

وعش أبنيه 

وأعشش فيه 

 وإيد بتحن واطبطب 

وقلبي من الوجع أداويه 

وصوت يهمس

 يشق الليل

 وحضن أمان يدفيني

وفجر جديد 

 يجيب لي نهار يطمني 

وأعيش أناجيه

تجمعنا حروف الشوق

 في كلمة حب

وتحلى بالسهر لياليه

لكن الفجر لسه بعيد 

يا دوب في الحلم متخفي 

وانا وقلبي 

بنحلم بيه

كلمات الشاعرة 

فاطمة علام

أبلة فاطمة