كلمات الشاعرة 

منى عبد الرحمن

 مكانش البُعد بالساهِل …

لكنِّي بعدت

عشان ما اقدرش اكون هامِش فِ قلب ديوان

عشان ما اقدرش يوم اتهان

ولا احِسِّش بأي أمان

أنا ما اقدرش اكون إحساس بينزف شوق

وقلب يكون وطن محروق

بيطرح حُب والآخر

بيجمع ذكريات من فوق

خيال مَنقوش علىٰ حيطة

يا دوبها أبُص لُه واحكي

وقلبي ماليه حِفان ثورة

حنين عامِل هناك زيطَة

وهُوَّ يبُص لي ببرود

خيال مَوْؤود

حقيقي بعِدت… لكني

بروحي فيك

وقلبي خلاص فَلَت منِّي

عشان يرضيك

مكانش البُعد بالساهل

عيون جُوَّاك بتِتجاهِل

وروحَك قاسية وعنيدة

وانا عنيدة

حكايتي معاك فِ تنهيدة

تقول انَّك ظَلمت كتير

كَسَرت حنيني ووجودي

وحُبِّي كبير

وَهَبتَك روحي وحدودي

وفِ الآخر مفيش فايدة

مكانش البُعد بالساهل

لكنِّي بعِدت

   كلمات الشاعرة 

منى عبد الرحمن