كلمات الشاعرة 

 چيهان أحمد النجار

عشان خاطري …

============

إلى الفكرة اللي ناسياني بقالها زمان

يمين بالله وماليكي كمان حلفان

مكانك جوه احشائي فى آخر حتة جنب القلب والشريان

كلامي يارفيق العمر ياصاحبي…

ياساكن روحي والأخطاء

ياباني العمر على معنى حروفه كاتبها كيف تشاء

انا ملكك يمين وشمال

تعالى عاوزة افضفضلك وعايزة اوصفلك الأحوال

تعالى شعر أو قصة..تعالى بص لك بصة..

تعالى العب معاك خلاويص

وياريتك تقول لسه

وحشتيني/ يافكرة مطلعة عيني

تعالي شوية هاوديني انا عيانة والله وعاوزة ونيس

تعالي وحِلى حبة الكيس وهاتي عديتك ضحكة

وهاتي الشمع والفوانيس

وحشتيني/ بقالي ايام اروح ناحية ضفاف الشعر ولامرة تقابليني

تعالي يافكرة مشتاقة…..

دى نار الشعر حراقة

ونفسي اقول…بعت رسول من المهجة.. رجعلي بدون حروف خيبان

بعت القلب جه عيان

بعت الشوق رجعلي وقال معادش مكان

وانا والله لو قادرة لاجيلك مشي بس قوليلي أى مكان

أنا غاوية…وكل حواسي دى ناوية تكون خدامة مهما كان….. وحشتيني 

      كلمات الشاعرة 

 چيهان أحمد النجار