مات النهار
والكون كئيب
والشمس من قبل الوفاه
مدفونه في بطون المغيب
والليل صوان
منصوب على دم القتيل
والنن من فيض السواد
اصبح اسير نفس المصير
مات اللي مات
والليل ضرير
ولا نجمه بتشق الظلام
ولا نقطه بتحن لخرير
السيل جفاف
بيهب من عين الخريف
والنهر في السبع العجاف
بيصب في عيون الكفيف
سرسوب شعاع
جايز يكون عابر سبيل
جاهل قوانين الحياه
قبل الأوان بدأ المسير
شق الصوان قدم عزاه
سأل الجناه مين اللي مات
قالوا القتيل
نبض الضمير
عاش النفاق
وليسقط الصدق المبين
يا أبها الحرف المساق
كاالموج مرفوع الجبين
أوقد جفاك الصدق من عليائه
أوقد طواك الإفك في أحشائه
أبشر فإن الحق أشهر سيفه
في مقلة الزيف اللعين
ونقول لمين
والصوت دفين اسفل زنازين السكات
لو مره فاض بيه الحنين
ما يحرروش غير الآهات
مات اللي مات
والنعش داير ما اكتفاش
ياكل باحث في اللي فات
كل اللي قبلك راح ما جاش
مترين قماش
اتنين في واحد طول بعرض
واحد مرفرف في الفضاء
والتاني ساكن ارض ارض
والقهر فرض
مفروض على بعض العباد
والليل في آخر كل عرض
ساحب وراه مشروع حداد
شق الفؤاد
آخر سراسيب الحياه
إبسط يا واد
أصبحت في ضيافة الإله
…………………………
آخر سراسيب الحياه
سلامه أبو النجاه
Discussion about this post