محمد جمعة يكتب :كان بدي أعيش

كان بدي أعيش
انا لو مُت
خلي مكانتِك زي ماهي
وما تعزيش
***********

مالكه العِصمة لقلبي في إيدِك
زحفًا جالك بده يعيش
لكن لجل جلالك … حتما
قلبي … يموت !!
لكن انتِ ما تتهزيش

انا متكلبش بصمة فيش
لكن عامل حر و طاير
رغم جناحي مقصص ريش
مهما عليت .. انا عندك حاطط
زاهد صوفي كما الدرويش

ملكًا كنت …
لكن جوه تابوت مملكتي
مت … سكنت
قصري المرمر من غيرك انتِ
بقى دلوقتي ما يلزمنيش
عرشي … مفيش

بلقيس انتِ
هُدهدى قالِك تفاصيل عيشتي
حقك تاخدي الروح لو شئتي
قسما عظما
هي معاكِ .. ياريت ماتجيش
حتى إن حقِك ما ترديش

انا مش عايز تاجي الضايع
عمري ما كنت لحسنك بايع
لكن عايز سيرتي الصح
تفضل عندِك … ما تصديش

كل آيات الشكر قريتها
حتى دموع الفجر لقيتها …
لسه ف خد الوجد باقيتها
بس داريتها ولا شوفتيش

كل كلام الشِعر لاغيته
حتى ميزان القافيه .. رميته
تعب القلب اللي انا هديته
بقى دلوقتي ما يسعفنيش

مش كلمات سهلة و مكتوبه
لاء .. دي حروفي كانت مندوبه
خرجت تبكي عشان مطلوبه
لبنك الهم …
خايفه تلاقي السطر مفيش
وحياة الله ما تتاخديش

هي حياة .. بالطول بنعيشها
حتى ان كان العرض بتاعها
ما بيكفيش
لكن جبراً لازم اعيشها
حتى إن قلتِ ما تعرفنيش

سبعا / ضبعا / نمرا … طبعا
كل جوارح بيئة نفسي
نهشت فيا ما رحمتنيش
لولا الصورة الساكنه ف حسي
كان شبعني النوح تلطيش

صدق / مشاعر مش كدابه
عشقي رواية حكي ربابه
عشت العمر …روتين ورتابه
عندِك جد اللي ما عشتوش
مش ب استجدي الموت مايجيش

انا مخلوق من كم مشاعر
انا مصلوب ع الوحده وشاكر
ربي العاِلم … انكِ ضفتي …
فوق الحلم امل مرشوش
لكن حلمي ان سابني وهاجر
ح ابكي كإني ….انا ما حلمتوش

***********************
كلمات الشاعر / محمد جمعة

Mohamed Gomaa