طوق نجاه

كلمات
الشاعر احمد صبري

محتاج ل حبة طبطبة
محتاج ناس طيبة
محتاج عوض اللي شوفته
من سنيني المتعبة

عايش ف اصعب مرحلة
أحلام كتيرة مترحلة
كل إللي فات واللي قابلته
أوجاع عليا متفصلة

محتاج ل حد يشدني
من ذكريات بتهدني
وعشان انا حساس اوي
محتاج ل حضن يحسني

محتاج انام حاسس امان
وانسى إللي باع و خان
محتاج حياه هادية ورايقة
محتاج مكان غير المكان

عايز قلوب جواها خير
وحبيبة تفرح لما اغير
محتاج صديق اد الطريق
لأني باتعامل بضمير

صبرت ياما ع الغباوة
وعقلي اتاكل ب حلاوة
وطلعت ف الاخر موهوم
مافيش محبة مافيش غلاوة

ومهما اداري محنتي
واشوف حياتي بتنتهي
جوايا شيء رافض يموت
جوايا عايز يبتدي

من سجن نفسي والحياه
مين هيرمي طوق نجاه
مين اللي قلبه يضمني
يحاوطني من كل اتجاه
طوق نجاه